: فرقوں میں ایک فرقہِ انسان چاہیے (تلاشِ حق کی ایک سچّی کہانی)
(حصّہ 37)
----------------
ایک
بار اُس کے دادا نے اُس سے کہا کہ "اپنی بیوی پر نظر رکھا کرو, عورت ذات کو اتنی
آزادی دینا ٹھیک نہیں ہے۔ تم اُس سے پوچھا کرو کہ کہاں جا رہی ہے اور کب واپس آئے گی۔"
تو اُس نے اپنے دادا سے کہا کہ "مجھے اعتماد ہے, اور یقین ہے کہ میرے اعتماد کو
ٹھیس نہیں پہنچے گی" اُس کے دادا نے اُسے ٹوکتے ہوئے کہا "کسی پے اندھا اعتماد
کرنا درست نہیں ہے, تمھیں یقیناً اپنی بیوی پر اعتماد ہو گا لیکن پھر بھی دھیان رکھنا
چاہیے" تو اُس نے کہا " دادا جان, میں نے کہا مجھے اعتماد ہے, یہ نہیں کہا
کہ مجھے اپنی بیوی پے اعتماد ہے, اگرچہ کہ مجھے اُس پر بھی اعتماد ہے, لیکن میرے اِس
رویے کی بنیاد اللّٰہ پر اعتماد ہے, اپنے مُرشد پر اور اُن کے پیغام پر اعتماد ہے اور
خود اپنے آپ پر اعتماد ہے۔ اللّٰہ پر اعتماد کہ میں نے اُس کے نام کی خاطر اپنی بیوی
کو گھر سے باہر نکلنے کی اجازت دی اِس لیے وہ میری بیوی کو گُمراہ نہیں ہونے دے گا
اور اُس کی حفاظت کرے گا, مُرشد پے اور اُن کے پیغام پر اعتماد یہ کہ اُن کی تربیت
اور اُن کی کوشش کی برکت میری بیوی کو راہِ راست پر رکھے گی۔ اور اپنے اوپر اعتماد
یہ کہ میں جب گھر سے دور ہوتا ہوں تو اپنا آپ سنبھال کے رکھتا ہوں, جہاں کام کرتا ہوں
وہاں لوگ مجھ میں لاکھ بُرائی نکالیں گے لیکن کوئی یہ نہیں کہہ سکتا کہ میں بدنظر ہوں۔
جب میں کسی کی بہن, بیٹی, بیوی کو بُری نظر سے نہیں دیکھتا, جو جذبات میری بیوی کی
امانت ہیں اُن میں خیانت نہیں کرتا تو مجھے یقین رہتا ہے کہ میری بہن, بیٹی, بیوی بھی
محفوظ رہے گی, جو شخص خود خراب ہوتا ہے وہ سب پر شک کرتا ہے, جس طرح کسی اور کی بہن,
بیوی, بیٹی سے مِلتا تھا اُسی طرح سوچتا ہے کہ میری بہن, بیوی, بیٹی کے ساتھ بھی ایسا
کچھ ہو سکتا ہے, اِس لیے اُن پر بےجا پابندی لگا کر, شک کر کے, اور اکثر مار پیٹ کر
کے بھی اپنے کرتوت کا پھل دیکھنے سے بچنے کی کوشش کرتا ہے, لیکن دنیا مکافاتِ عمل ہے۔
جس نے کچھ غلط کرنا ہے وہ روک ٹوک کے باوجود کر جائے گا اور جس نے نہیں کرنا وہ آزاد
رہ کر بھی اپنی حدود کی پاسداری کرے گا۔ تو میرے خیال میں عورت پر بےجا پابندی لگا
کر خود پریشان رہنے اور اُسے پریشان کرنے کی جگہ مرد کو اپنے اوپر پابندی لگانی چاہیے
اور اپنا آپ درست رکھتے ہوئے اپنی خواتین کی دیکھ بھال کرنی چاہیے جو شخص خود درست
ہو گا وہ کبھی بھی عورت پر بےجا پابندی نہیں لگائے گا۔ اور میری بیوی تو اللّٰہ کے
نام کی خاطر گھر سے نکلی ہے اُس کے والد یا بھائی وغیرہ ہمیشہ اُس کے ساتھ آتے جاتے
ہیں اور میری امّی یا اُس کی امّی بھی ہمیشہ اُس کے ساتھ ہوتی ہیں اس لیے فکر کی بات
نہیں ہے اطمینان رکھیے, اللّٰہ خیر کرے گا۔" اُس کے دادا نے کہا "کبھی کبھی
تم اتنی سمجھداری کی بات کرتے ہو کہ میں حیران رہ جاتا ہوں, ٹھیک ہے تم جو کہہ رہے
ہو مجھے سمجھ آ گیا اللّٰہ تمھیں اور تمھارے مُرشد کو سلامت رکھے جنھوں نے تم لوگوں
کو اتنی اچھی سمجھ اور شعور دیا۔ خوش رہو ہمیشہ, اللّٰہ تم لوگوں کو اِس نیک مقصد میں
کامیاب کرے۔" اُس کے دادا نے کھُلے دل سے اُس کی تعریف کی اور دُعا دی۔
ایک
دفعہ اُس کی بیوی نے بھی اُس سے شوخ سی ناراضگی سے کہا "آپ مجھ سے کبھی نہیں پوچھتے
کہ کہاں گئی تھی یا کہاں جا رہی ہو کب آؤ گی, آپ نے تو کبھی منع بھی نہیں کیا مجھے
کہیں آنے جانے سے, آپ کو نہیں لگتا کہ بندے کو تھوڑا شوہر پن بھی دکھانا چاہیے۔" تو اُس نے اپنی بیوی سے کہا "میرے خیال میں
شوہر پن بیوی پے روک ٹوک کرنا نہیں ہے۔ ویسے بھی تم خود ہمیشہ مجھے بتا کر جاتی ہو۔
اور اللّٰہ مجھے ایسی ذبان نہ دے, ایسا اختیار نہ دے جو اِس راہ سے کسی کو روکنے کا
سبب بنے۔ ایسا شوہر پن نہیں کرنا میں نے, جو میرے مُرشد پاک کے پیغام کی ترسیل میں
رُکاوٹ بن سکتا ہو۔ میں تمھیں اپنے تمام حقوق معاف کرتا ہوں۔ اپنے شوہر کے لیے تمھاری
جو ذمہ داریاں ہیں اُن میں اگر کوئی کمی واقع ہو جائے تو میں اللّٰہ کو حاضر ناظر جان
کر وہ سب ذمہ داریاں تمھیں معاف کرتا ہوں, اور میں تمھیں اللّٰہ کے نام کے لیے وقف
کرتا ہوں۔" اُس کی بیوی نے کہا "اللّٰہ کے نام کے لیے تو میں بھی خود کو
وقف کرنا چاہتی ہوں لیکن انشاء اللّٰہ میں اپنی ذمہ داریوں سے منہ موڑ کر نہیں بلکہ
تمام ذمہ داریوں کو نبھاتے ہوئے اس پیغام کو عام کروں گی, یہ میرے اکیلے کی محنت نہیں
ہے آپ سب اِس میں میرے ساتھ ہیں۔ انشاء اللّٰہ یہ پیغام گھر گھر پہنچے گا۔"
: وہ جسمانی طور پر دن بہ دن ڈھلتا جا رہا تھا اور اپنی گھریلو ذمہ
داریوں سے تقریباً الگ تھلگ ہو چُکا تھا۔ جو شخص اپنے مُرشد سے کبھی ہر ماہ ملنے جایا
کرتا تھا اب وہ مہینوں اُن سے ملاقات نہ کر پاتا۔ ایک الگ دنیا تھی اُس کی جس میں کسی
کو آنے جانے کی اجازت نہیں تھی۔ اُس نے اپنے آپ کو بہلا لیا تھا کہ اللّٰہ کی راہ میں
لوگوں کے لیے وہ بس اتنا ہی کر سکتا تھا, اکثر اپنے آپ کو ملامت کرتے ہوئے وہ خود سے
کہتا "تم کیا سمجھتے ہو خود کو, اپنی گزشتہ زندگی دیکھو اور اپنی اوقات یاد کرو,
شکر کرو کہ کسی اللّٰہ والے کا سایہ نصیب ہو گیا, تم کیوں اولیاء کے سلسلوں کو بدنام
کرنا چاہتے ہو, تم اِس لائق نہیں ہو کہ صوفیا کی بات کر سکو, یہ تمھارا کام نہیں ہے
اور شاید تمھاری معزوری بھی اسی وجہ سے ہے تاکہ تم ایسے حلقوں سے دور رہ سکو جہاں اللّٰہ
کا ذکر ہو رہا ہو۔ اور دھیرے دھیرے اُس نے اپنے دل کو اِس سوچ پر راضی کر لیا کہ میرا
کام یہیں تک تھا۔ میں لوگوں کے لیے ایک صُبحِ روشن کا طالب تھا تو میرے مُرشد پاک اور
اُن کی جماعت دن رات اُسی کوشش میں مصروف ہیں۔ مجھے لوگوں کی بہت فکر رہتی تھی نا,
شاید اسی لیے اللّٰہ نے مجھے اُن لوگوں سے مِلوا دیا جو لوگوں کی بہتری کے لیے کچھ
کر رہے ہیں اور مجھے یہ بھی بتا دیا کہ لوگوں کے لیے کچھ کر جانے والے لوگ کیسے ہوتے
ہیں۔ افسوس کے میں اُن جیسا بھی نہ بن سکا, اور ضروری تو نہیں کہ ہر وہ شخص جو اللّٰہ
کی طلب رکھتا ہو اُسے اِس طلب کو عام کرنے کا بھی شرف حاصل ہو۔ تجھے اللّٰہ کی تلاش
تھی تو اللّٰہ مل گیا تجھے بس تیرا کام یہیں تک تھا, لوگوں تک پیغام پہنچانا تیرے بس
کا کام نہیں ہے۔ اِن خیالات نے اُسے ہر چیز سے دور کر دیا گھنٹوں اکیلے بیٹھے رہنا
اُس کا معمول بن گیا تھا اور طبیعت میں ایک عجیب سا چِڑچڑا پن پیدا ہو گیا جس کی وجہ
سے وہ اندر ہی اندر گھُلتا جا رہا تھا۔ زندگی سے بیزار ہو کر اُس نے اپنا آپ نشے میں
ڈبو دیا اور اِس قدر بگاڑ کا شکار ہوا کہ تنگ آ کر اُس کی بیوی نے اُس سے علیحدگی اختیار
کرنے کا فیصلہ کر لیا لیکن اپنے شوہر کو بتائے بغیر جب وہ اپنے والد کے ساتھ اُن کے
گھر سے جانے کو تیار ہوئی تو گھر سے نکلتے ہوئے اُس نے اپنے والد سے کہا "ابو
میں کسے چھوڑ کر جا رہی ہوں, اِس شخص سے میرا ایک رشتہ میرے مُرشد کے توسط سے بھی ہے,
میں اُنہیں اِس حال میں نہیں چھوڑ سکتی, وہ اتنے کمزور نہیں ہیں کہ اتنی چھوٹی سی چیز
سے ہار جائیں, میں پھر سے کوشش کروں گی انہیں واپس لانے کی, لیکن اِس بار میں اپنا
شوہر جان کر نہیں بلکہ اپنے مُرشد پاک کا مُرید سمجھ کر انہیں واپس لانے کی کوشش کروں
گی۔ اُس کی بیوی نے اپنا ارادہ تبدیل کیا اور اُسے پتہ بھی نہ چلا کہ اُس کے ساتھ کیا
ہوتے ہوتے رہ گیا تھا۔
(جاری ہے)
فرقوں
میں ایک فرقہِ انسان چاہیے (تلاشِ حق کی ایک سچّی کہانی) (حصّہ 38)
----------------
اُس
کی بیوی نے پہلے کی طرح اُس سے حُبِ الہٰی سے متعلق سوال کرنا شروع کیے تاکہ اُسے یاد
دلایا جا سکے کہ وہ کون ہے۔ دونوں میاں بیوی کے بیچ سوال و جواب کا یہ سلسلہ جو کئی
سالوں سے منقطع تھا ایک بار پھر شروع ہوا تو اُس پر اِس سب کا کافی اچھا اثر پڑنا شروع
ہوا۔ اِس دوران ایک روز اُس کی بیوی نے اُس سے کہا "آج آپ مجھے شیطان کے بارے
میں سمجھائیں, کیا ہے شیطان, اور کیسے لوگوں کے ذہن پر قابض ہوتا ہے۔" تو اُس
نے مسکرا کر کہا "لوگ تم سے اللّٰہ کے بارے میں پوچھتے ہیں اور تم مجھ سے شیطان
کے بارے میں پوچھ رہی ہو۔؟ تم خود بہتر جانتی ہو, مجھ سے کیا پوچھ رہی ہو۔؟" اُس
کی بیوی نے کہا "مجھے نہیں پتہ کہ میں کیا جانتی ہوں اور کیا نہیں لیکن میں یہ
جاننا چاہتی ہوں کہ آپ کیا جانتے ہیں۔"
اُس
نے ایک لمبی سانس لیتے ہوئے بات شروع کرتے ہوئے کہا "ابلیس وہ جن ہے جسے یہ سعادت
حاصل ہوئی کہ درجات کی بُلندی کے باعث وہ فرشتوں کا سردار بن بیٹھا, کسی بھی مخلوق
کے درجات تب بُلند ہوتے ہیں جب اللّٰہ اُس پے نظر کرتا ہے۔ جب اللّٰہ نے ابلیس کو مردود
کیا تو اللّٰہ نے اُس سے نظر پھیر لی۔ اور اللّٰہ جس سے نظر پھیر لے وہ شئے فنا ہو
جاتی ہے لیکن ابلیس کو اللّٰہ نے قیامت تک کی زندگی دی۔ اب ابلیس کی بقا انسان کی نظر
سے جُڑ گئی۔ اُس کی کوشش ہوتی ہے کہ انسان کی نظروں کے سامنے رہ سکے, دنیا کی ہر شئے
شیطان کے کام کی چیز ہے کیونکہ اِن تمام چیزوں کے ذریعے وہ لوگوں کی نظر میں آ سکتا
ہے۔" اُس کی بیوی نے اُسے ٹوکتے ہوئے کہا "لیکن زمین پر موجود ہر چیز کیسے
اُس کے کام کی ہو سکتی ہے۔؟" تو اُس نے مسکرا کر کہا "اب یہ سوال پوچھ ہی
لیا ہے تو خاموشی سے سُنو جواب طویل ہے۔ شیطان جب مردود ہوا تو کہتے ہیں کہ ہزاروں
سال تک وہ اللّٰہ سے مانگتا رہا تھا اور اُس نے جو جو مانگا اللّٰہ نے اُسے سب دیا۔
یہ بات سُن کر میں نے سوچا کہ کاش مجھے ایسا مجھے موقع ملتا تو میں اللّٰہ سے اللّٰہ
کو ہی مانگ لیتا, یا کم از کم معافی ہی طلب کر لیتا, لیکن شاید ابلیس انسان کے خلاف
منصوبہ بندی میں مصروف تھا اور اپنی انا کی آگ میں جل رہا تھا اِس لیے وہ معافی کا
خواستگار نہیں ہو سکا۔ میں نے سوچا کہ اگر میں ابلیس کی جگہ ہوتا تو انسان کی دشمنی
میں اللّٰہ سے کیا کیا مانگتا۔ کسی کے سامنے آئے بنا اُس کے سامنے آنا, اُس کی سوچ
میں اپنی آواز بھرنا, اور انسان سے اُس کا نُور چھین کر خود کو طاقتور بنانے کا فن,
شاید میں ایسی ہی چیزیں مانگتا, اور جب جن ہونے سے لے کر فرشتوں کا سردار ہونے تک کا
سفر کیا ہوتا تو راہ میں جو کچھ بھی میں نے دیکھا ہوتا ہر شئے کو انسان کے خلاف استمعال
میں لانے پر دسترس مانگتا۔ تاکہ میں انسان کو تقسیم کر سکوں۔ لوگوں کو ایک دوسرے کے
خلاف کر سکوں اور ایک دوسرے کے خلاف سوچنے میں اِس قدر محو کر سکوں کہ وہ اپنا آپ سوچنا
بھول جائیں۔ انسانوں کو تقسیم کرنے کا کام ابلیس نے انہی طاقتوں کے بل بوتے پے کیا
ہے۔ یاد کرو کہ زمین پے ہونے والے پہلے قتل کی وجہ انسان کی اپنی خواہش تھی۔ سوچو کہ
اُس وقت میں جب انسان گناہ کے وجود سے ہی ناآشنا تھا اُس وقت اُس نے کس طرح گناہ کا
ارادہ اور ترغیب حاصل کی۔؟ یقیناً یہ اُس کا نفس تھا جو شیطان کا پیروکار تھا اسی لیے
اُس نے قابیل کو اللّٰہ کی نافرمانی کی راہ پر ڈال کر اُسے ابلیس کے مشابہ کر دیا۔
ابلیس کا کام انسان کو اُس کے مقام سے گِر جانے کے خیال میں مُبتلا کرنا ہے, اب تُو
نے فلاں کام کر لیا تو تُو اپنے رب سے دور گیا, اب نیکی کرنے کا کیا فائدہ۔؟ اِس طرح
کے بہت سے خیالات انسان کی سوچ میں گھر کیے رہتے ہیں۔ انسان چار عناصر کا مرکب ہے آگ,
ہوا, مٹی اور پانی۔ اصل میں مٹی ایسی چیز ہے جس میں یہ تینوں چیزیں اکھٹی ہوتی ہیں۔
شیطان آگ ہے اور انسان نور ہے۔ نور کی ظاہری صورت پانی ہے۔ اسی لیے سائنس پانی کو زندگی
کی بنیاد تسلیم کرتی ہے۔ انسان کے ظاہر ہونے سے پہلے تمام مخلوق اپنے اپنے درجے پر
موجود تھی آگ آگ تھی اور پانی پانی تھا مگر جب انسان کا جسم تخلیق ہو رہا تھا تو فرشتوں
نے کہا کہ یہ زمین میں فساد برپا کرے گا۔ شاید انہوں نے آگ اور پانی ایک جسم میں یکجا
ہوتے دیکھ کر یہ سوچا ہو گا کہ یہ فساد برپا کرے گا۔ گندم کا دانہ بھی انہی چار عناصر
کا مرکب تھا اسی لیے اُس پیڑ سے دور رہنے کا حکم ہوا۔
شیطان
لوگوں کے خیالات سے کھیلتا ہے۔ ہر چیز کچھ نہ کچھ کہتی ہے۔ دنیا کا مال اسباب دیکھ
کر ہر شخص کے دل میں اُسے حاصل کرنے کی چاہ پیدا ہوتی ہے۔ یہ اس تمام اسباب سے آتی
ہوئی آواز ہے جسے ہم اپنے نفس کے کانوں سے سُنتے ہیں, آئس کریم دیکھ کر آئس کریم کھانے
کا جی کرتا ہے, گاڑی, مکان, دکان, عورت وغیرہ, ہر اچھی چیز دیکھ کر انسان کے اندر اُسے
حاصل کرنے کی خواہش ہوتی ہے اور ہر غم, بیماری, دُکھ, تکلیف سے انسان دور بھاگتا ہے۔
کیوں کہ دنیا اور نفس سے جُڑی لذتیں انسان کو اپنی خواہش کرنے کی دعوت دیتی ہیں اور
رنج و الم لوگوں کو خود سے دور رہنے کی صدا دیتے ہیں, اونچے اونچے محل ہوں یا چھوٹے
چھوٹے مکان, سب کچھ نہ کچھ کہتے ہیں, انسان
ایک غیر محسوس انداز میں اِس زبان کو سُنتا ہے اور اُس سے متاثر بھی ہوتا ہے۔ شیطان
کو اِن تمام زبانوں پر عبور حاصل ہے اِس لیے وہ امیروں کو غریبی سے ڈرا کر گمراہ کرتا
ہے اور غریبوں کو امیری کی چاہت میں مبتلا کر کے راہِ راست سے دور کرتا ہے۔ خوبصورت
کو اُس کے خود کے حُسن پے مغرور ہونے کا سبق اور کم صورت کو اپنی صورت کی فکر کرنے
کا درس, نفس کی زبانی شیطان ہی سُناتا ہے۔ اُس نے انسانوں سے اُن کا نور چھین چھین
کر بہت کچھ بنا لیا ہے۔ آگ میں جتنا حُسن نظر آتا ہے یہ سب اس لیے دکھائی دیتا ہے کیونکہ
ہم اُسے نور سے دیکھ رہے ہوتے ہیں۔ تم مشینز کو دیکھو, لوگوں کی رہائشگاہوں کو دیکھو
جو وقت کے ساتھ ساتھ اور ذیادہ دلکش ہوتے جا رہے ہیں۔ کیمرہ, تصویر, ٹیلی وژن کو دیکھو۔
کسی زمانے میں ٹی وی ایک نایاب شئے تھا۔ لکڑی کے ڈبے میں, بڑے بڑے چینل یا بٹن وغیرہ
اور پھر لوگ جیسے جیسے اِس کے گرویدہ ہوتے گئے ویسے ویسے یہ ڈبہ خوب سے خوب تر ہوتا
گیا۔ ہم جب کسی چیز کو دیکھتے ہیں تو درحقیقت ہم اپنی نظر سے اُسے چھو رہے ہوتے ہیں۔
سائنس بتاتی ہے کہ جب دو چیزیں آپس میں ٹکراتی ہیں تو دونوں اجسام کے مولیکیولز کا
کچھ نہ کچھ حصّہ ادھر سے اُدھر ضرور منتقل ہوتا ہے۔ جیسے ہر اُس چیز کو جسے ہم چھُوتے
ہیں اُس پے ہمارا فنگر پرنٹ رہ جاتا ہے۔ اب سوچو کہ شیطان کو اِس کا کیا فائدہ ہے۔؟
تو اُسے یہ فائدہ ہے کہ وہ ہمارے لمس, ہماری سوچ اور ہماری نظر کے ذریعے اپنی ترقی
کا سامان کرتا ہے۔ اور ہمارے لیے بہتر سے بہتر پھندا تیار کرتا ہے۔ اللّٰہ اپنی مخلوق
کو رحم و کرم کی نظر سے دیکھتا ہے اور جب وہ غضب و جلال کی نظر سے دیکھ لے تو اکثر
پورے کا پورا شہر نیست و نابود ہو جاتا ہے۔ لیکن یہ نیست و نابود ہو جانا بھی نیست
و نابود ہو جانے والوں پے اللّٰہ کا رحم ہی ہے کہ اُس نے اُنہیں مزید گمراہی سے بچا
لیا۔ اچھا, بُرا, مومن, کافر سب اللّٰہ کی نظر میں رہتے ہیں اِسی لیے اُن سب کا وجود
زندہ رہتا ہے, لیکن جسے اُس نے مردود کر دیا اور اُس پر نگاہ کرنا چھوڑ دیا وہ انسان
کی نظر کا محتاج ہو گیا۔ اسی لیے وہ انسان کی نظروں میں آنے کے بہانے تلاش کرتا رہتا
ہے۔ کسی سنگ تراش کو پتھر میں حُسن پیدا کرنے کا مشورہ دیتا ہے تو کسی کو کسی کرتب
کی ترکیب بتاتا ہے, امیر میں اپنی امیری ظاہر کرنے کا شوق پیدا کرتا ہے اور غریب کو
اپنی مفلسی کی وجہ سے خود کو دوسروں سے کمتر سمجھنے کا خبط لاحق کرتا ہے۔ یہ سب شیطان
کا کھیل ہے, اُس کا کام ہے لوگوں کو اللّٰہ کے خیال سے دور رکھنا, اور وہ لوگوں کو
انہی کے خیالات کے مطابق شر انگیز گمانوں میں مبتلا کرتا ہے۔ اور یہ سب کمال انسان
کی اپنی ہی نظر کا ہے۔ انسان جب کچھ دیکھتا, سُنتا, یا چکھتا ہے تب ہی وہ اُس کی خواہش
کرتا ہے اگر وہ کسی چیز کو جانتا نہ ہو تو وہ اُس کی خواہش بھی نہ کرے۔ اسی لیے اللّٰہ
نے ہر چیز کی حد مقرر کر دی۔ جب تک کوئی شئے اللّٰہ کی مقرر کردہ حد میں ہے تب تک وہ
شیطان سے محفوظ ہے اور جہاں حد سے تجاوز کیا وہاں وہ چیز شیطان کے زیرِ اثر آ جائے
گی۔ شیطان کو ہَوا کی مانند پوری زمین میں ہر جگہ موجود ہونے کا اختیار حاصل ہے۔ اسی
فضا میں تمام انسانوں کا نور بھی موجود رہتا ہے جسے اپنی چالوں کے ذریعے تقسیم کر کے,
شیطان لوگوں کی سوچ تقسیم کرتا ہے۔
ہندوستانی,
پاکستانی, کالا, گورا, مسلم, غیر مسلم, میرا محلہ, میری گلی, میرا دوست, اور نہ جانے
کس کس نام کی تقسیم کو انسانوں پر مسلط کیا جا چُکا ہے۔ ہم حُب الوطنی, حُبِ دین, حُبِ
اہل و اعیال یا اپنی معاشی و معاشرتی مجبوریوں کے نام پر, یا اِسے اپنا علاقائی, قومی,
یا مذہبی تشخص جان کر اِس تقسیم کو نبھائے چلے جا رہے ہیں۔ اور اِس جانب توجہ ہی نہیں
دیتے کہ حُب آدم کے بنا نہ تو حُب الوطنی کام کی چیز ہے اور نہ ہی حُبِ دین۔ جن قوموں
کو اپنے انسانی تشخص کی خبر نہیں وہ اپنے علاقائی اور قومی تشخص کے نام پر ایک دوسرے
کا گلہ کاٹنے میں مصروف ہیں۔
(جاری ہے)
فرقوں
میں ایک فرقہِ انسان چاہیے (تلاشِ حق کی ایک سچّی کہانی) (حصّہ 39)
----------------
"شیطان ایک سوچ کا نام ہے۔ جسے وقت میں ایک مقام دیا گیا۔ یوں سوچو
کہ تمام زمین پر ایک آگ کی چادر سی بچھی ہوئی ہو, اُس آگ کی چادر کو تم شیطان سمجھو
جو ہوا کی لہروں کی مانند ہر جگہ پھیلا ہُوا ہے لیکن وہ نقصان تب پہنچائے گا جب انسان
اُسے نقصان پہنچانے کا موقع دے گا۔" اُس کی بیوی نے پھر سے اُسے ٹوکتے ہوئے کہا
"اگر شیطان اتنا پست ہے تو وہ لوگوں کے دماغ تک کیسے پہنچ جاتا ہے۔؟" اُس
نے مسکرا کر کہا "بتا رہا ہوں, تم سکون سے سنو تو سہی, کوئی بات سمجھ نا آئے تو
بعد میں پوچھ لینا, ویسے میں کوشش کروں گا کہ مکمل بات کر سکوں۔ اللّٰہ نے اپنے محبوب
صلی اللّٰہ علیہ و آلہ وسلم اور دیگر انبیاء کی صورت ایک خاص لباس اور انداز لوگوں
کے سامنے پیش کیا۔ داڑھی رکھنا, سطر ڈھانپنا, اُٹھنا بیٹھنا, کھانا پینا, ان سب چیزوں
کے طریقہ کار واضح کیے گئے۔ جو رب یہ کہتا ہے کہ نہیں دیکھتا میں تمھارے چہرے کو بلکہ
دیکھتا ہوں تمھارے دل۔ اُسی رب نے جسم اور چہرے کے انداز بیان کیے اور الگ الگ لباس
و انداز کو پسند ناپسند فرمایا۔ضرور اس کی کوئی خاص وجہ ہو گی۔ جب غور کیا تو سمجھ
آیا کہ شیطان انسان کو اور انسان شیطان کو دیکھ سکتا ہے۔ لیکن شیطان انسان کو تب دیکھ
سکتا ہے جب انسان شیطان کو موقع دیتا ہے۔ لباس دیکھو جیسے عرب پہنتے ہیں جس میں تمام
سطر چھپ جاتی ہے۔ لیکن انسان ایک دوسرے کو اور خود کو چُست لباس میں دیکھنا پسند کرتا
ہے۔ اِس کی بنیادی وجہ یہ ہے کہ انسان آنکھ کے نور سے دیکھ رہا ہوتا ہے اِس لیے آگ
خوبصورت دکھائی دیتی ہیں۔ آگ اس لیے کہہ رہا ہوں کیوں کہ ہم ظاہر میں جو کچھ بھی دیکھتے
ہیں اُس پر آگ کا ایک غلاف موجود ہوتا ہے۔ جیسے اگر ہم سمندر کی تہہ میں جا کر اپنے
ارد گرد دیکھیں تو نظر آنے والی ہر چیز اور نظر کے بیچ پانی موجود ہو گا اُسی طرح زمین
میں ہر جانب منظر اور نظر کے بیچ آگ رہتی ہے۔
یہ
ہے شیطان جسے آگ سے پیدا کیا گیا اور اُس آگ کو زمین میں ہوا کی مانند موجود رہنے کا
اختیار دیا گیا, اور نظر سے اپنا خیال دوسرے شخص کے دماغ تک پہنچانے کا فن عطا کیا
گیا۔ جیسے اُس نے حضرت حوّا کو گندم کا دانہ کھانے کی ترغیب دی, تو وہ اِسی نظر کی
طاقت سے دی۔ ہم لوگ اُس وقت میں جی رہے ہیں جس میں دجال کا نظام قائم ہو چُکا ہے۔ اور
ہر اچھا بُرا انسان اِس نظام کا غُلام ہے۔ جسے ہم 'سسٹم' کہتے ہیں۔ یہ نظام لوگوں کو
اپنے حساب سے چلنے پر مجبور کرتا ہے۔ لوگ ہی اِس کا حصّہ بنتے اور لوگ ہی اسے چلاتے
بھی ہیں لیکن اِس کی ڈور شیطان کے ہاتھ میں ہے۔ سب لوگ ذہنی طور پر اِس سسٹم کے غلام
ہیں جو انھیں سوچنے کی صلاحیت سے محروم کرتا ہے اور دن رات یہی سوچ ہمارے ذہنوں میں
بھرنے کی کوشش میں محو رہتا ہے کہ تم اِس سسٹم کا کچھ نہیں بگاڑ سکتے اگر تم نے اس
کے خلاف جانے کی کوشش کی تو مار دیے جاؤ گے, اور اکثر ہوتا بھی یہی ہے۔ سسٹم کی بنیاد
ڈر پر ہے۔ شیطان کی چال یہ تھی کہ لوگوں کو بے لباس جسم دکھائے جائیں اور جب بے لباس
جسم دیکھنے والی نگاہیں کسی بالباس جسم کو دیکھتی ہیں تو اُس لباس میں بے لباسی تلاش
کرتی ہیں۔ عورت کو فوراً احساس ہو جاتا ہے کہ اُسے کس نظر سے دیکھا جا رہا ہے۔ بے لباس
جسموں کو دیکھ دیکھ کر اپنی نظر میں شہوت بھرنے والے لوگوں کی ہوِس سے بھری نظریں صرف
دوسری عورتوں پر نہیں بلکہ اُن لوگوں کی اپنی ماں, بہن, بیوی, بیٹی پر بھی اثر انداز
ہوتی ہیں خواہ وہ انہیں پاک سوچ سے ہی کیوں نہ دیکھ رہے ہوں۔ یہ شہوت اور ہوِس اللّٰہ
کی تجلیات دیکھ کر کم بھی کی جا سکتی ہے۔ جس طرح یہ بے لباس اجسام شیطان کی تجلیات
ہیں اُسی طرح اللّٰہ کا نام, اللّٰہ والوں کی صورت, اللّٰہ کی یاد دلانے والی ہر چیز
اللّٰہ کی ہی تجلی ہے۔
مسجد,
مندر, کلیسا اور اس طرح کی سب جگہیں جو خالقِ جہان کی یاد دلائیں سب اللّٰہ ہی کی تجلیات
ہیں۔ جس طرح شیطان کی تجلیات سے نظر شر آلودہ ہوتی اُسی طرح اللّٰہ کی تجلیات سے نظر
وسیع اور پُر نور بھی ہو سکتی ہے۔ لیکن ہم ایسے جکڑے ہوئے ہیں کہ ہم سوچ ہی نہیں پاتے
کہ ہمارے ساتھ کیا ہو رہا ہے۔ جب لوگ شیطان کے نظام کے مغلوب ہوئے تو اِس نظام کے تحت
اُس نے کم لباسی اور بے لباسی کو عام کیا۔ ہم لوگ ایسا لباس پہننا پسند کرتے ہیں جس
میں ہماری سطر نمایاں ہو۔ جب ہم ایسے کپڑے پہنتے ہیں جن میں ہمارا جسم نمایاں ہو تو
دوسرے لوگوں کے ساتھ ساتھ, ہماری شرمگاہوں تک, شیطان کی نظر کی بھی رسائی ہو جاتی ہے
اور وہ اپنی نظر کے ذریعے ہمارے اندر شہوت, حرص, ہوِس, حسد, لالچ, بدگمانی اور نفرت
وغیرہ بھرتا رہتا ہے جس کی وجہ سے انسان شیطان کے اشاروں پر چلنے پے مجبور ہو جاتا
ہے۔
آگ
اور نور کی ایک ترتیب ہے۔ زمین پر ہر چیز میں آگ اور نور ایک خاص تناسب سے موجود ہے۔
جیسے پھل, سبزی وغیرہ اُگاتے ہوئے دھوپ اور پانی کی ضرورت پڑتی ہے, ہوا اور مٹی کی
حاجت ہوتی ہے اِن تمام چیزوں کو خاص تناسب سے اکھٹا کر کے کوئی بھی پھل سبزی وغیرہ
تیار ہوتا ہے اور جب انسان اُسے کھاتا ہے تو اُس میں موجود نور انسان کے جسم میں گھُل
جاتا ہے اور آگ اُس کے جسم کے مختلف راستوں سے باہر نکل جاتا ہے۔ اگر یوں کہا جائے
تو درست ہو گا کہ کھانے پینے کی اشیاء کا باطنی حصّہ انسان کے باطن میں مل جاتا ہے
اور اُس کا ظاہری حصّہ اُس کے جسم سے باہر آ جاتا ہے۔ کھانا پکاتے ہوئے بھی ہم آگ اور
پانی کا استمعال کرتے ہیں۔
ایک
چیز پر غور کرنا کہ اکثر چیزوں میں لذّت پیدا کرنے کے لیے اُسے مختلف مصالحہ جات میں
زیادہ سے زیادہ پکایا جاتا ہے۔ خاص کر ہمارے برصغیر میں کھانے کی لذّت کی خاطر اکثر
اُس کی غذائیت ہی مار دی جاتی ہے۔ ہم کھانے پکاتے ہوئے درحقیقت اُس میں موجود نور کو
جلا کر اُس میں آگ بھر رہے ہوتے ہیں اسی وجہ سے انبیاء, اولیاء, صالحین نے سادہ غذا
پسند کی کیونکہ لذیذ کھانے انسان کے نفس کو لذتوں کا عادی بناتے اور شہوت پر اُبھارتے
ہیں, اکثر لوگ شکایت کرتے ہیں کہ ہم اپنی نفسانی خواہشات سے ہار جاتے ہیں اِس کی بھی
بنیادی وجہ ہمارا کھانا پینا ہی ہوتا ہے۔ لیکن اِس کھانے پینے میں وہ سب بھی شامل ہوتا
ہے جو ہم دیکھتے اور سُنتے ہیں۔ طرح طرح کی خوارک ہم اپنے جسم و روح میں اُتارتے رہتے
ہیں جو ہماری گمراہیوں اور کوتاہیوں کا باعث بنتی ہے۔ اکثر تم نے سُنا ہو گا کہ کسی
کو کوئی بات سمجھ نہ آئے تو لوگ کہتے ہیں کہ بات اُس کے اوپر سے گُزر گئی۔ یعنی بات اُسے سمجھ نہیں آئی لیکن اِس بات کی گہرائی
یہ ہے کہ ہمارے سَر سے اوپر ایک نور کا سمندر موجود ہے جس میں ہم اپنے جسم سے نہیں
بلکہ اپنی عقل, اپنی سوچ اور اپنے گُمان کے مطابق سفر کرتے ہیں۔ یوں سوچو کہ آسمان
سے لے کر ہمارے دل تک نور کی ایک لہر موجود ہے اس لہر کا کچھ حصّہ ہمارے سَر سے لے
کر سینے تک موجود ہے اور باقی ہمارے سَر سے اوپر آسمان تک موجود ہے۔ انسان کے درجات,
اُس کی سوچ, اُس کا فہم, سب اسی لہر میں بلند ہوتے ہیں۔ جب کوئی شخص ہم سے کوئی ایسی
بات کرتا ہے جو ہمارے فہم سے بُلند ہوتی ہے تو وہ بات اسی نور میں محفوظ ہو جاتی ہے
اور ایک وقت آتا ہے کہ انسان کا فہم اُس بات تک پہنچ جاتا ہے اور وہ بات اُسے سمجھ
آ جاتی ہے۔ بزرگوں کی محفل میں بیٹھنے کے لیے اسی لیے کہا جاتا ہے کیونکہ اکثر وقتی
طور پر تو یہ باتیں انسان کی سمجھ میں نہیں آتیں لیکن یہ باتیں اُس کے نور میں, جسے
ہم لوگ لاشعور کا نام بھی دیتے ہیں, محفوظ ہو جاتیں ہیں اور انسان کی سوچ کو بُلند
کرنے میں مدد دیتی ہیں۔ یہ نور ہمیں دکھائی نہیں دیتا لیکن شیطان اِس نور کو دیکھ سکتا
ہے اور اِس میں اپنے خیالات باآسانی شامل کر سکتا ہے۔ اِس مقصد کے لیے ضروری تھا کہ
شیطان اتنا بُلند ہو سکے کہ انسان کے قد سے ذیادہ بڑے قد کا مالک بن سکے۔ جس طرح نوری
اشیاء نور کی علامت ہیں اُسی طرح ناری اشیاء آگ کی آماجگاہ ہیں۔ بُلند و بالا عمارتیں
بھی اِس کام میں شیطان کی مدد کرتی ہیں۔ زمین کے اوپر موجود چیزوں میں نورانیت ذیادہ
ہوتی ہے اور زمین کے نیچے موجود چیزوں میں آگ ذیادہ ہوتی ہے۔ جب ہم کوئی عمارت تعمیر
کرتے ہیں تو اگر کوئی کم بُلند عمارت ہے تو محض مٹی اور لکڑی کے استمعال سے تعمیر ممکن
ہے لیکن ذیادہ بُلند عمارت بنانا مضبوط دھاتوں کو استمعال میں لائے بغیر ممکن نہیں۔
ہر چیز کا کچھ نہ کچھ مصرف ہے زمین پر موجود ہر چیز کسی نہ کسی طرح انسان کے حق میں
یا مخالف کچھ نہ کچھ کردار ضرور ادا کر رہی ہوتی ہے۔ جب ہم آگ سے بنی چیزوں کو اپنے
ارد گرد جگہ دیتے ہیں تو یہ سب چیزیں شیطان کو ہمارے قریب ہونے اور قد میں ہم سے بلند
ہونے میں مدد کرتی ہیں۔ جس کے ذریعے وہ بلند سے بلند مقام سے ہمارے ذہن پے حملہ آور
ہو سکتا ہے۔" اُس کی بیوی نے کہا "لیکن کیسے, آخر شیطان اتنا طاقتور کیسے
ہو جاتا ہے۔؟" اُس نے کہا "تمھیں پتا ہے شیطان کا قد کتنا ہے۔؟" اُس
کس بیوی نے نفی میں سر ہلایا تو اُس نے کہا "شیطان جس کا اصل قد ہمارے پاؤں کے
انگوٹھے سے ذیادہ بُلند نہیں ہے آج وہ ہم سے
اتنا بُلند بنا بیٹھا ہے جتنی بُلندی پر آج یہ سیٹلائٹس گھوم رہی ہیں۔ اتنی بُلندی
سے جب وہ کسی کے دماغ میں کوئی خیال ڈالتا ہے تو انسان کسی کٹھ پُتلی کی طرح اُس کا
کہا مانتا ہے۔" اُس کی بیوی نے اُلجھے ہوئے لہجے میں کہا "یہ کیسے ہو سکتا
ہے کہ شیطان اِس طرح ہم سب کے دماغ پے اثر انداز ہوتا ہو, اور اللّٰہ نے کیوں دی اُسے
اتنی طاقت, اور اگر ایسا ہے تو ہم اُس سے کیسے بچ سکتے ہیں۔؟"
اُس
نے مسکرا کر کہا "تمھیں معلوم ہے نا کہ ہمارے ارد گرد ہر طرف الگ الگ طرح کی لہریں
موجود ہیں۔؟ ریڈیو, ٹی وی, موبائل فون, اور نہ جانے کون کون سی لہروں کے جال نے ہمیں
ہر طرف سے گھیر رکھا ہے, ہمیں نہیں معلوم کہ ہمارے آس پاس ان لہروں کے ساتھ کتنے قسم
کے الفاظ اور تصاویر گھوم پھر رہے ہیں اور وہ الفاظ اور تصاویر ہماری سوچ پر کیا اثر
ڈال رہے ہیں۔ شیطان انہی لہروں کے ساتھ شب و روز ہمیں اندر ہی اندر کھوکھلا کرتا جا
رہا ہے۔ جب مجھے شیطان کی اِن سب طاقتوں کا علم ہوا تو میرے دل نے مجھ سے سوال کیا
کہ کیا تجھے شیطان سے ڈر نہیں لگ رہا تو میں نے دل سے کہا کہ نہیں بلکہ یہ سب سُن کر
میں خود کو اور ذیادہ طاقتور محسوس کر رہا ہوں کیونکہ وہ شیطان ہے مردود ہے اور انسان
اشرف المخلوقات ہے۔ تو یقیناً انسان اُس سے کہیں ذیادہ طاقتور ہو گا۔ شیطان کی طاقت
دیکھتے ہوئے انسان کو ڈرنا نہیں چاہیے بلکہ اپنی طاقت کو پہچاننے کی کوشش کرنی چاہیے۔
کہتے ہیں کہ کسی کی طاقت کا اندازہ کرنا ہو تو اُس کے دشمن کو دیکھ لو۔ جتنا کوئی شخص
طاقتور ہو گا اُتنا ہی بڑا اُس کا دشمن بھی ہو گا۔ ویسے تو شیطان سبھی انسانوں کا دشمن
ہے لیکن سب لوگ اُس کے معیارِ دشمنی تک نہیں پہنچ پاتے۔ کیونکہ عام طور پر لوگ خود
ہی اپنے دشمن بنے ہوتے ہیں۔ اِس لیے شیطان کے اصل دشمن وہ ہوتے ہیں جو اُس کے بنائے
پھندوں سے نکل جاتے ہیں۔"
(جاری ہے)
فرقوں
میں ایک فرقہِ انسان چاہیے (تلاشِ حق کی ایک سچّی کہانی) (حصّہ 40)
----------------
اُس
کی بیوی نے پریشان سے لہجے میں سوال کیا "لیکن اس قدر طاقتور دشمن سے کوئی کیسے
بچ سکتا ہے۔؟ کیا مکمل پردہ کر کے, حجاب پہن کر شیطان سے بچا جا سکتا ہے۔؟ لیکن وہ
تو اتنی بُلندی پے بیٹھا ہم سب کی سوچ سے کھیل رہا ہے, ہم کیسے اپنا دفاع کر سکتے ہیں۔؟
کیا اِن اونچی اونچی عمارتوں کو گرا دیا جائے, کیا اِن سیٹلائٹس کو تباہ کر دیا جائے,
کیا ریڈیو, ٹی وی, موبائل فون وغیرہ کو ختم کیے بغیر ہم شیطان سے چھُٹکارا حاصل نہیں
کر سکتے۔؟" تو اُس نے کہا "کر سکتے ہیں۔ ہم, شیطان سے اور اُس کے نظام سے,
کہیں ذیادہ طاقتور ہیں۔ شیطان نے خود ایک بات کہی تھی کہ اے اللّٰہ تیرے مخلص بندوں
کا میں کچھ نہیں بگاڑ سکوں گا۔ مانا کہ وہ ہمیں بے حجاب کر چُکا ہے اور ہم مجبور ہیں
اِس بے حجابی کو اپنانے پر۔ کیونکہ اِس سسٹم کی غلامی کیے بغیر ہمارا جینا مشکل ہو
جائے گا۔ مانا کہ ہم لوگ بہت دور آ چُکے ہیں, لیکن اِن سب چیزوں کو تباہ نہیں کرنا
بلکہ شیطان کے ہتھیار, اُسی کے خلاف استمعال کرنے ہیں۔ ہمارے ارد گرد یہ جتنی لہریں
ہیں یہ سب ہمارے ہی نور کے درجات ہیں جن میں جگہ جگہ اب شیطان کا بسیرہ ہے۔ اگر ہم
اپنا آپ جان جائیں تو انہی لہروں کو اپنے حق میں بھی استمعال کر سکتے ہیں۔ لیکن اپنا
آپ جاننے کے لیے اِس وقت میں سب سے پہلے تقسیم سے نجات حاصل کرنی ہو گی۔ زمین پر کھنچی
لکیروں کی بنیاد پر ہم سب نے اپنے اپنے دِل میں جتنی لکیریں کھینچی ہیں سب کو مِٹا
کر ایک انسان بن کر سوچنا ہو گا۔ شیطان ہمیں بہکانے میں شیعہ, سُنی, ہندو, مسلم نہیں
دیکھتا۔ اُس کے لیے ہم سب انسان ہیں۔ ایک دوسرے کے لیے یا اللّٰہ کے لیے نہیں تو دشمن
سے مقابلہ کرنے کے لیے ہی ہم ایک بار اکھٹے ہو جائیں۔ اِس بار کسی ایک مُلک یا قوم
کے نام پر نہیں بلکہ انسانیت کے نام پر ایک ہونے کی ضرورت ہے ہمیں۔
یہ
سچ ہے کہ انسان کی پیدائش کے ساتھ ہی شیطان اُسے اپنے گھیرے میں لینا شروع کر دیتا
ہے۔ اور انسان اپنے دشمن کو پہچان ہی نہیں پاتا اور اُس کے بنائے گڑھوں میں ہی اپنی
پوری زندگی گُزار کر گمراہی کی موت مر جاتا ہے۔ حقیقت یہ ہے کہ شیطان سے بچنے کے لیے
اللّٰہ کے ساتھ خالص ہونا ضروری ہے۔ جو اللّٰہ کے ساتھ خالص ہو گیا وہ کچھ بھی کرتا
پھرے, بے لباس ہو, بے حجاب ہو, بے شرعا ہو, یا چرسی, شرابی ہو, اگر اُس کے اعمال سے
حقوق العباد متاثر نہیں ہوتے تو اِس کا مطلب ہے کہ اِن تمام تر بُرائیوں کے باوجود
شیطان اُس کا کچھ نہیں بگاڑ سکا اور ایک شخص نمازی ہو, اپنے لباس کا خیال رکھتا ہو,
اپنی نظر کی حفاظت کرتا ہو, با اخلاق ہو, لوگوں کے حقوق بھی پورے کرنے کی کوشش کرتا
ہو اور گناہوں سے بھی دور رہتا ہو لیکن اگر وہ اللّٰہ کے ساتھ خالص نہ ہو تو سب اعمالِ
صالحا کرنے کے باوجود وہ گمراہ ہی ہے۔ اِس کا مطلب یہ کہ باقی رہ جانے والا, قائم رہ
جانے والا اور سچا عمل, اللّٰہ کے ساتھ خالص ہونا ہی ہے اس کے علاوہ ہر عمل فانی ہے۔
جس کاغذ پر اللّٰہ کا نام لکھ دیا جائے اُس کی قدر و منزلت بدل جاتی ہے۔ اُسی طرح زندگی
کا جو پل اللّٰہ کے لیے گُزرا وہی پل زندگی ہے۔ تو جو شخص اللّٰہ کے لیے جینا شروع
کرتا ہے اُس کا ہر کام عبادت ہے, اللّٰہ کے قُرب کا سفر ہے۔ اور جو اللّٰہ کے سوا کسی
اور مقصد کو اپنی ذندگی کا محور بناتا ہے اُس کی عبادت و ریاضت بھی گمراہی ہی ہے۔"
اُس کی بیوی نے حیرت سے پوچھا "کیا آپ یہ کہہ رہے ہیں کہ اللّٰہ کے ساتھ خالص
ہو جانے کہ بعد گناہ بے اثر ہو جاتا ہے۔؟ وہ گناہ بھی کرے تو وہ اللّٰہ کے قُرب میں
ہوتا ہے اور گناہ اُسے اللّٰہ سے دور نہیں کرتا۔؟" اُس نے مسکرا کر کہا
"ہاں میں یہی کہہ رہا ہوں۔ جو اللّٰہ کے ساتھ خالص ہو جاتا ہے اُس کا غلط بھی
صحیح ہوتا ہے۔ کیونکہ اُس کا صحیح اور غلط دونوں اللّٰہ کے لیے ہوتا ہے اِس لیے وہ
ہر طرح سے صحیح ہوتا ہے۔ اگرچے کہ لوگ اُسے غلط سمجھتے ہوں۔
جیسے
ایک بار بابا فرید رح نے رمضان کے مہینے میں عصر کے وقت ایک مہمان ہندو کا دل رکھنے
کی غرض سے اُس کا لایا ہوا شربت پی لیا تو مُریدین نے ایک ہندو کی فرمائش پر روزہ توڑ
دینے پر سخت تنقید کی مگر دوسرے دن سب تنقید کرنے والے شرمندہ ہو گئے جب آپ رح کی اِس
ادا پر اُس شخص کا تمام علاقہ مسلمان ہونے کے لیے آپ رح کے پاس آ گیا اور کہا کہ کتنا
عظیم الشان مذہب ہے آپ کا, جس کے ماننے والے اپنا روزہ توڑنا تو گوارہ کر لیتے ہیں
لیکن کسی کا دل نہیں توڑتے۔ یہ اِسی بات کی مثال ہے کہ جو اللّٰہ کے ساتھ خالص ہو جاتا
ہے اُس کا غلط بھی صحیح ہو جاتا ہے۔ ایسی اور بہت سی مثالیں موجود ہیں جو اِس بات کی
نشاندہی کرتی ہیں کہ گناہ یا ثواب کا فیصلہ عمل کرنے والے کے دل کے حال پے ہوتا ہے۔
قتل کرنے کا حکم ایک جج بھی دیتا ہے اور ایک دہشتگردوں کا لیڈر بھی, لیکن دونوں کے
حکم میں صحیح اور غلط کا فرق اُن کی جگہ سے ناپا جاتا ہے نہ کہ اُن کے فیصلے سے۔ جب
ہم شیطان کا قد سوچ کر گھبراتے ہیں تو ہمیں یہ بھی سوچنا چاہیے کہ اگر اُس کا قد سیٹلائٹس
تک ہے تو ہمارا قد تو لاہوت تک ہے اگر ہم اپنی روح کے اصل قد سے آشنا ہو جائیں تو شیطان
ہم سے گھبرانا شروع ہو جائے گا۔شیطان کا یہ کھیل تماشہ انسان کو اُس کے اصل کی جانب
لوٹنے سے روکنے کی سازش ہے اور یہ سازش اُسی وقت تک کارگر ہے جب تک کہ انسان اپنی پہچان
سے دور ہے۔ جس انسان کو اپنی پہچان حاصل ہو جائے شیطان اُس کا کچھ نہیں بگاڑ سکتا۔
جوش ملیح آبادی کی ایک رباعی ہے کہ
ہر
رنگ میں ابلیس سزادیتا ہے
انسان
کو بہرطور دغا دیتا ہے
کرسکتے
نہیں گناہ جو احمق ان کو
بے
روح نمازوں میں لگا دیتا ہے
اُس
کی بیوی نے غور سے اُس کی جانب دیکھتے ہوئے کہا "کیا ان سب باتوں سے آپ مجھے یہ
سمجھانا چاہ رہے ہیں کہ آپ اُس مقام کو پہنچ چُکے ہیں جہاں غلط بھی صحیح ہو جاتا ہے۔؟"
تو اُس نے ہنستے ہوئے اپنے کانوں کو ہاتھ لگاتے ہوئے کہا "نہیں میں تمھارے سوال
کا جواب دینے کی کوشش کر رہا تھا۔ اور اولیاء کا مقام سمجھا رہا تھا۔ میں تو بہت ناقص
شخص ہوں, میں تو اخلاص والوں کی گرد کو بھی نہیں پہنچ سکتا۔" اُس کی بیوی نے اُداس
سے لہجے میں کہا "آپ اپنے دشمن کو اتنی اچھی طرح پہچانتے ہیں پھر بھی آپ اُس کی
چال میں پھنسے ہوئے ہیں, کیا فائدہ ایسے علم کا جس سے آپ اپنا آپ ہی درست نہیں کر پائے,
یہ سب پینا پلانا کیوں ہے آپ کے ساتھ۔؟ اگر آپ شیطان کو اور اُس کے کھیل کو اتنی اچھی
طرح سمجھتے ہیں تو کیوں اُس کے ہاتھوں کھلونا بنے ہوئے ہیں۔؟" تو اُس نے کہا
"میں کھلونا نہیں ہوں, مجھ سے کھیلنے کے لیے شیطان کو دو چار دفعہ اور پیدا ہونا
پڑے گا۔ میں جیسا بھی ہوں, جو بھی کرنے میں مگن ہوں لیکن اپنے رب کی یاد سے غافل نہیں
ہوں۔ میں ٹوٹ رہا ہوں, لیکن ابھی بکھرا نہیں ہوں۔ ڈوب رہا ہوں, لیکن ابھی ڈوبا نہیں
ہوں, ضروری تو نہیں ہے کی ڈوب ہی جاؤں۔ اُبھر بھی تو سکتا ہوں۔ اپنی تمام تر بُرائی
کے باوجود مجھے یقین ہے کہ میرا مُرشد میرے ساتھ ہے۔ اولیاء اللّٰہ ہر طرح کے اچھے
بُرے لوگوں کو اِس خاطر بھی فیضیاب کر دیتے ہیں تاکہ ہر طرح کی اچھی بُری محفلوں تک
اللّٰہ کا پیغام پہنچ سکے۔ گناہگار ہونا اللّٰہ سے دور ہونے کی یا نیکوکار ہونا اللّٰہ
کے قریب ہونے کی دلیل نہیں ہے۔ کسی شخص کا معیار صرف اُس کے معیارِ گُفتگو سے ہی پرکھا
جا سکتا ہے۔ اگر تاریخ اُٹھا کر دیکھو تو بہت سے ایسے لوگ ملتے ہیں جو ویسے تو شرابی
قسم کے لوگ تھے لیکن اُن کا لکھا کلام مسجدوں, درگاہوں, میلاد وغیرہ میں دلگیر عقیدتوں
اور بے اختیار رقتوں کے ساتھ سُنا اور سُنایا جاتا ہے۔ اور بہت سے عابد, زاہد لوگوں
کے پاس تنقید کے سوا کچھ نہیں ہوتا۔ تم جو کہہ رہی ہو میرے ذہن میں بھی ایسے خیال آتے
رہتے ہیں لیکن میں خود کو راضی نہیں کر پاتا۔ میں ہمیشہ اپنے رب کو محسوس کر کے چلا
ہوں اُس کا احساس کم یا ذیادہ ہوتا محسوس ہو جاتا ہے مجھے, لیکن میں اپنی تمام غلطیوں
کے باوجود اِس احساس کو کم ہوتا محسوس نہیں کرتا شاید اِسی لیے اِس سب کو بدلنے کی
فکر بھی نہیں کر پایا۔ لیکن تمھاری بات میں دم ہے۔ میں انشاء اللّٰہ کوشش ضرور کروں
گا۔
